Tuesday, December 22, 2015

Koel soos n Komkommer oor Kommer

Kom ons wees nou eerlik, bekommernis is deel van menslike natuur. Hoe ons ookal vir onsself vertel dat jy in die oomblik van NOU moet leef, weet ons daar is n more wat kom. Selfs al is jy nou op vakansie bekommer jy steeds oor dinge. Gaan die kinders dit geniet of gaan jou skaapboud op kersdag reg uitkom of gaan die weer lekker wees of selfs dat die vakansie te vinnig verby gaan wees. Jy draai ook dalk jou sente om en bekommer jou daaroor. 

Die realiteit is dat bekommernis jou genot van die lewe en jou vakansie steel. Wat is die punt van vakansie as jy jou gaan bekommer? Dus, wees bewus van 2 dinge, jy gaan ek kan altyd iets vind wat jou bekommer, en tweedens dit steel die sin van dinge by jou.

Mense vra baie vir my in hulle kommentaar op my blogs hoekom ek altyd so positief klink. My blogs is soms uit teenreaksie op die bekommernisse in my lewe en nie n buite konteks optrede nie. 

Dit is dalk die eerste belangrike punt om te maak en dit is dat EK KIES om nie my bekommernis my te laat beheer nie. 

Nou, mense dink dat so n keuse daartoe lei dat jy niks aan jou situasie doen nie. Mense dink dat dit n 'kop in die gat' reaksie is, maar die teendeel is waar. Ek het net agtergekom dat om teen die despair wat saam met bekommernis loop te kies, die eerste deel van die oplossing van probleme is. 

Mense vergeet dat aksies in jou brein begin en nie jou hande wat die besem gryp en begin vee nie. Tweedens het ek geleer dat as ek nie halt roep erens in die bekommernis nie, dit gaan sneeubal sodat ek oor meer en meer dinge my gaan bekommer.  Derdens het ek uit my situasies geleer dat n mens baie meer kan uitstaan as wat mens dink. Vierdens het ek besef dat as ek vir n week lank my bekommer oor dat ek oor n week gaan honger lei, ek reeds vir n week lank honger is, elke dag, die hele dag. Bekommernis laat jou reeds die probleem ervaar nog voor dit gebeur of enigsins 'gaan' gebeur. In die vyfde plek soek ek uit alles die les wat ek moet leer. Laastens is ek gelowig, ek het n onverskrokke geloof dat God my sal help. En daardie geloof kom nie altyd in die vorm dat die beker my sal verbygaan nie, maar in die wete dat God altyd by my is.

Dus, wat doen ek? Ek kom uit die gewoonte om my oor alles tot vervelens toe te bekommer. Ek praat uit ondervinding, want ek was so dat ek naderhand niks meer geniet het nie, tot ek besluit het om anders met myself om te gaan. Ek verstaan dat dit ook te doen het met my persoonlikheid en dat dit nie altyd is wie jy is nie, so hier volg n paar algemene wenke.

1. Soek die mooi in NOU

Kyk vir n oomblik om jou rond en kyk wat jy het. Soveel keer fokus ons op wat ons nie het nie, maar wanneer ons soek na wat ons het, sien ons dat die glas meer as half vol is. Wanneer ek dit doen, vervaag my despair, want my beker loop oor.

2. Doen iets lekker

Gisteraand is die laaste aand wat my dogtertjies by my is vir die vakansie. Terwyl ek opsien na die weggaan en oor allerhande issues my bekommer, besluit ek summier om hulle die liggies in Lawley straat te gaan wys. Oppad soontoe sing al die kinders saam met die radio. Daar aangekom hang hulle by die vensters uit en juig oor elke kersvader, kruis en kersboom. Die genot en opwinding op hulle gesiggies laat my van als vergeet. Hulle leef IN die oomblik en leef hulleself uitbundig uit. Hulle bekommer hulle nie oor hoe hard hulle skree 'kersboom pappa' nie. Daar leer hulle my toe n groot les, en toe ons by huis kom kry ek drukkies en 'dankie pappas'.

Ek kan hulle nie see toe vat nie, maar gisteraand is n beter ervaring om by 'in te check' as n week in Mauritius. Kinders waardeer die klein goeterkies, en bekommer hulle nie oor die klein karretjie waar 6 agterin moet sit nie. 

3. Worry realisties

Ons dink soms alles waaroor ons bekommer is 10 uit 10. Ek het die reel van 10 by my niggie geleer en dit werk so. As iets lewensgevaarlik is, dan is dit n 10, anders is dit op meeste n 8. As daar bloed uitkom is dit n 8, anders op die meeste n 6. As ek niks daaraan kan doen nie, dan is dit n 6, maar as ek iets daaraan kan doen, op meeste n 4. As ek iets daaraan kan doen, maar niks doen nie, is dit n 4, en wanneer ek iets daaraan doen word dit n 2.

Wanneer iets onder n 5 is, dan kantel die skaal na my kant toe, want dan is ek in beheer. 

Ek het verder in my lewe geleer dat 99% van dinge waaroor ek my bekommer nie gebeur nie, en dit wat wel gebeur min kere so erg is soos dit oor en oor in my kop afgespeel het. 

4. Soek alternatiewe

Nou, gewoonlik op hierdie punt behoort jy anders te dink, want daar is nooit net een antwoord op jou situasie nie. Selfs wanneer jy jouself in n hoek ingeverf het bly daar altyd die opsie om deur die nat verf te loop. Natuurlik is dit nie gemaklik nie, maar dit is doenbaar.  Soms moet jy terugtrek na jou ma toe of jou X-Box vir n jaar bere om jou punte te verbeter. Maar lekker of nie, dit maak jou weer dankbaar dat jy n ma het om na terug te trek of n X-Box gehad het om mee te speel.

Soms voel dit dan steeds vir jou asof jy nie opsies het nie, maar die besluit om deur die verf te loop is steeds JOU besluit. En meeste van die kere as jy dit moet doen en jy kyk terug op dit, was dit nie eers so erg soos jy gedink het nie. 

5. Jy is altyd in beheer

Wanneer jy jouself in n situasie van despair bevind, kasty ons onsself omdat ons dink en voel dat dit ons skuld is. Ok, dit kan en is soms die oorsaak. Maar het jy ooit daaraan gedink dat as dit jy was wat dit veroorsaak het, dat jy dan ook die oplossing is? 

Ek het geleer dat ek en ek alleen my situasie kan verander. Ander mense is daar om jou te help, maar net jy en jy alleen skryf die eksamen. 

6. Moenie ophou glo en bid nie

Daar is altyd lig in die tonnel, en dit is nie n trein wat van voor kom nie. Het jy al agtergekom dat jou oe aanpasbaar is in die donker? As jy jou oe knip, waar dit eers pikdonker was is daar skielik vorms wat jy kan uitmaak. 

Blinde mense leer ons dat al kan jy nie sien nie, het jy steeds ander sintuie wat jy kan gebruik. Jou hande kan jou help voel sodat jy nie in iets vasloop nie. Jou neus kan jou laat ruik waar die uitgang van die tonnel is. Jou vel kan jou laat voel waar die hitte van die uitkoms is en jou ore kan jou laat luister waar die voeltjies sing. 

As jy glo dat daar n uitkoms is, sal dit kom vir jou en sal jy dit soek. As jy dit nie glo nie gaan jy dalk in n hopie sit en vergaan, dalk centimeters van die uitgang af. Hoe sal jy ooit weet?


Tuesday, December 8, 2015

Moenie jou beeste name gee nie!



'n Boer sal vir jou vertel dat jy nooit vir 'n bees of 'n skaap 'n naam moet gee nie, want dan is dit soveel moeiliker vir jou om hom te slag wanneer die tyd reg is.  'n Snaakse ding gebeur wanneer iets 'n naam kry, want onmiddelik het dit 'n persoonlikheid en is nie sommer maar net nog 'n bees wat op die land loop nie.  Ons sien deur die eeue hoe belangrik name is, en ek onthou nog soveel kleinkinders wat ont-erf is deur 'n oupa omdat die kind nie sy oupa se naam gekry het nie.  In die nuwe denke oor name en klanke, se ons dat name belangrik is wat jy kies vir kinders, want klanke gee 'n vibrasie af wat mense of aantrek of afstoot.

Elke ding het deesdae mos ook 'n politiese korrekte manier om jou oor die ding uit te spreek.  Mense is nie gestremd nie, maar fisies uitgedaag.  Kinders is nie pleinweg meer stout nie, maar hulle is eerder ADHD of een of ander ander afkorting.  So gee ons elke dag name aan dinge wat om ons gebeur.  Nou dink ek daar is 2 kante van die benaming van dinge, net soos met die skaap en die bees.

Aan die een kant is dit belangrik om dinge 'n naam te gee, want, indien dit universeel erkenbaar en definieerbaar is, weet mense presies wat dit is, en help dit om te diagnoseer en te behandel.  As mense nie name gehad het nie, hoe sou ons dan mense roep of weet met wie ons op die foon praat? So, die naamgewery het 'n doel om mense van mekaar uit te ken of om sekere dinge te identifiseer.

Naamgewery kan aan die ander kant baie vreemde "negatiewe" invloed ook kry.  Soms word dit soos met die bees dat wanneer jy dit 'n naam gegee het, dit baie moeiliker word om hom te slag.  Mense kruip maklik weg agter dinge soos hulle afkoms, hulle sindrome en dink dat wanneer dit 'n naam het, jy agter dit kan wegkruip.  Ons sien ook dat dit in families die geval is waar mense 'n van soos "Mandela" het, en dink dat dit jou moet en sal dra deur jou lewe. 
Eintlik gee die naamgewery aan "iets" die reg om 'n "iemand" te word.  Dit is dalk wat bedoel word met die skep van "karma".  Ek kom agter dat mense in die westerse wereld soms 'n probleem het met die idee of die woord, maar in werklikheid is dit nie altyd 'n kosmiese uitwerking van oorsaak en gevolg nie.  Soms is karma net die skep van 'n issue of 'n situasie.  Ek sien dit baie in verhoudings waar mense oor dinge begin praat wat hulle pla, dan gee hulle 'n "naam" aan 'n emosie, en dan word dit lewenslank 'n saak van geskil tussen mense.

Ek weet dat sielkundiges ons leer dat jy moet kan kommunikeer oor dinge, maar ek sien dit soveel keer dat dit juis hierdie naamgewery is wat dinge kompliseer tussen mense.  En dieselfde gebeur tussen mense as wanneer jy 'n bees 'n naam gee, dit skep komplikasies later wanneer dit nodig is om te slag en word al hoe moeiliker om die dier te slag.  Hierdie is so waar in verhoudings, veral wanneer ons met mekaar praat en ons emosies oordra, dan gee ons 'n vibrasie of 'n personifikasie aan ons emosies, en dan word dit soms onmoontlik vir die paartjie om dit geslag en opgelos te kry.

Ons loop daagliks met sulke dinge in ons verhoudinge rond, "jy laat my voel" byvoorbeeld is 'n kragtige benaming, want dit laat my blitsvinnig verstaan wat van my verwag word of nie van my verwag word nie.  Skielik plaas hierdie benamings van ons emosies ons in 'n kissie en daar bly ons.  Die kissies laat ons soms voel asof dit ons verstrengel, maar natuurlik kan dit ons ook vry maak. 

Daar gebeur ook ander dinge in die naamgewing van emosies en die verbalisering daarvan.  Kyk bietjie aan die begin van 'n verhouding, wat ons kalwerliefde noem, hoe "maklik" die verhouding is, terwyl hoe meer name ons aan dinge gee, hoe meer Karma ontstaan tussen mense.  Natuurlik voel dit onmoontlik om altyd net in daardie nirvana stadium te bly, sonder dat ons van mekaar sekere dinge verwag.  Ek advokeer gladnie hier dat mense nie met mekaar oor dinge moet praat nie, maar dat ons versigtig moet wees watter dinge ons name gee in ons verhouding, omdat ons verstaan dat as iets 'n naam het, dit baie moeilik is om daarvan ontslae te raak.  Die ander kant van die muntstuk is dat die "mooi" dinge wat ons name aan gee, ook net so moeilik is om van ontslae te raak.

Ons verval soms so in die groef van alles in ons lewens en verhoudinge name te gee.  Partykeer vergeet ons dat ons versigtig moet wees, want dalk, miskien verseker, is die dinge wat jou in jou verhouding pla, JOU issue en nie die van die verhouding of die ander persoon nie.  Daar is 3 persone in 'n verhouding betrokke, Ek, Jy en Ons.  Soms is JY reg, soms is die ander persoon reg, maar dit is nie waaroor dit in verhoudings gaan nie, dit gaan oor die ONS. 
Mense sukkel ongelooflik waneer hulle die ONS verantwoordelik maak vir iets wat nie die ons se probleem is nie, maar die ek of jy.  Soms moet jy jouself vra of EK my issue of probleem deel van ONS mag maak, want ons weet tog dat net ek my beeste kan voed of slag.  Soms het ons in ons lewens issues van dinge gemaak (hulle name gegee), maar omdat ons nie kans sien vir die slag van die bees nie, maak ons dit deel van ONS se verantwoordelikheid om dit te doen.  Elkeen van ons moet besef dat, alhoewel mense saam in 'n verhouding is, ek nie my issues in die verhouding kan indra nie.  Dit is MY bees, en dit is ek en ek alleen wat vir Blommetjie moet slag.

'n Boer gee nie sy beeste name nie, want soms is 'n bees net 'n bees.  Soms moet ons nie al ons gevoelens en emosies so benaam en analiseer, dat ons later nie kan doen wat ons moet doen nie.  Soms is emosies net emosies, en soms is situasies net situasies en soms is die ander persoon se aksies net aksies.  Jammer dat ek nou "name" daaraan gee, maar die beginsel is dat ons soms ons eie lewens kompliseer deur dinge MEER betekenis te gee as wat dit moet, en daardeur karma skep en ander verantwoordelik maak vir ons situasies en gevoelens.

Dit is natuurlik vir ander mense altyd makliker om jou bees vir jou te slag, want hulle is nie die een wat daaraan betekenis gegee het nie, dit is JY.  Vir ander is jou bees net 'n bees, en dit is altyd JY en JY alleen wat so voel oor 'n saak.  En dit is die laaste ding wat ons van mense "verwag" in verhoudinge, want ons dink dat as ek EK en al my benaamde beeste in die verhouding inbring, dit oplos in die groot ONS en dan word ek soms kwaad as hulle nie dieselfde deernis en gevoelens vir my beeste het nie.  Onthou altyd, JY het hulle name gegee, JY het hulle gevoer, en dit is en word onregverdig om van ander te verwag om dieselfde te voel en op te tree oor jou issues, as JY.

Monday, December 7, 2015

Opsies vir Stress!



Daar is 'n eksperiment in Amerika gedoen waardeur hulle 'n groot groep mense oor 'n 30 jaar tydperk analiseer het.  Die groep was gekies vir 'n eksperiment oor die invloed van stress en spanning op mense, om te bewys of die invloed van stress tot premature dood kan lei.  Natuurlik het hulle nie net hulle gesondheid in ag geneem nie, maar ook hulle stressvlakke in die algemeen, en die mees insiggewende hulle ingesteldheid oor stress.  Na 'n hele paar jaar het hulle die sterfterekords nagevors om te sien wie van die mense nog lewe, en 'n groot hoeveelheid van hulle was reeds oorlede.  Maar hulle het een vreemde feit agtergekom, een van die vrae in die eksperiment was of die persoon glo en dink dat stress tot jou dood kan lei.  Toe hulle na die statistieke kyk, het hulle agtergekom dat die mense wat gese het dat hulle NIE dink dit tot jou dood kan lei nie, se mortaliteit was noembaar baie laer as die wat gedink het die teenoorgestelde is waar.

Ek weet dat 'n mens met statistiek omtrent enige punt kan bewys, maar hierdie studie het my baie getref, want dit beteken tog dat daar 'n konneksie is tussen jou ingestelheid en mortaliteit.  Ek het al baie verwys na die werk van Louise Hay wat konneksies maak tussen selfs spesifieke emosies wat lei tot spesifieke uitwerking wat tot spesifieke siektes lei. 

Nou wil ek vandag so 'n klein oefening vir jou gee om jou te help om jou ingesteldheid teenoor jou lewe anders te sien. 

Ondervinding het ons nou al gewys dat omstandighede rondom jou nie net een oplossing of reaksie het wat daarmee saamgaan nie.  Dit is asl bewys met tweelinge dat alhoewel hulle in dieselfde omstandighede grootgeword het, hulle soms verskil in hulle idees oor dieselfde dinge.  So as daar nie 'n spesifieke reaksie is wat met 'n spesifieke aksie val nie, is daar tog opsies.  Daar word baie gepraat oor glas half vol en glas half leeg reaksies op dinge, en ook dat die grootste persentasie van mense makliker die glas half leeg sien.  Die eerste deel van die oefening is die besef dat die glas nie altyd propvol kan wees nie.  Daar is in jou lewe sekere situasies wat nie lekker is nie, stressvol is en jou in die nag laat wakker le.  Dus, die erkenning daarvan is die beginpunt, want jy kan nie altyd net die glas half vol sien nie, want dan fokus jy nie op dinge wat gedoen en afgehandel MOET word nie. 

Jou reaksie op 'n situasie is slegs 'n keuse, en vir die tweede punt van die oefening het jy nie nodig om die stukkie van die glas te gaan soek wat vol of leeg is nie.  Al wat jy hier doen is om IN die situasie wat jou laat opstress net 'n oomblik te gaan sit en te analiseer of daar 'n ander opsie of manier is om na die situasie te gaan kyk.   Hoe meer opsies jy kry en sien, hoe beter natuurlik.  Die opsies hoef nie altyd positief te wees nie, want wat jy doen is om balans te vind in HOE jy oor 'n spesifieke situasie voel.  Ek vind dat mense soms daardie emosie wat hulle het vat en dit so oor en oor en oor dink, dat dit sneeubal en hulle naderhand gladnie meer die son kan sien nie.  Dan gooi mense hulle hande in die lug en sien geen meer uitkoms nie.  Net so gevaarlik soos dit is om met jou kop in die wolke te leef en in drome nooit die realiteit hanteer nie, net so gevaarlik is dit om ook die een gevoel van negatiwiteit en vrees oor en oor uit te speel, want dan gebruik jy al jou energie op.  So, wanneer ek hier praat van ander opsies, beteken dit nie dat jy die vuur blus met water nie, maar stelselmatig die bol sneeu stukkie vir stukkie kleiner maak. Net die vraag:  "Is daar 'n ander manier om na die situasie en kyk en oor die situasie te voel?", verander alles.  Soms dink ons die ergste is die enigste opsie, en ons het nie energie om dit te hanteer nie, deur net te dink aan opsies kan jy skielik sien hoe maklik dit is om na die volgende vlak te beweeg.

Hoe hulle ookal eksperimente oor die brein doen, is daar nog nooit 'n glyskaal ontwikkel vir emosies wat dit kan kwantifiseer nie.  Maar eksperimente het al getoon dat sekere "verandering" in emosies sekere dele van die brein aktiveer en allerhande dinge soos adrenalien vrystel.  Maar dit vat oefening om dit reg te kry, en elke mens het sy manier om te weet wat hulle groewe en grafte is mbt emosies.  Daar is ook geen regte resep hiervoor nie, maar ek dink dat as jy hierdie oefening doen dit baie sal help.

Wanneer jy nou effens "anders", nie noodwendig "beter" voel nie, kan jy in die derde plek begin om te kyk na die konteks.  Een van die mees praktiese plekke waar ek altyd begin, is om op te hou dink dat ek die enigste is wat sukkel met sekere dinge.  Almal het geldelike, emosionele en verhoudings probleme.  Deur te erken dat ek nie die enigste is nie, bring reeds 'n mate van verandering in jou houding.  Een goeie voorbeeld hiervan is die hospitaalbed-eksperiment.  Kom ons se jy het hoofpyn en jy dink dit is die einde van jou lewe, dink vir 'n oomblik aan mense wat terminaal met kanker stry, dit vat nie jou hoofpyn weg nie, maar dit laat jou besef dat daar ander is wat met groter issues as jy sukkel.  Skielik sien jy jou situasie in konteks en vir wat dit werklik is, nie die einde van jou wereld nie.

Terwyl ons so oor konteks praat, kan konteks ook soms 'n bydrae lewer tot baie ongelukkigheid.  Dit is soms die mense en wereld om jou wat jou emosies skep, deur sekere "mode-aksies".  In die finansiele bedryf sit ek voor kliente, en een van die vrae wat baie my vra is of AL die kliente so sukkel met hulle finansies.  Ons praat deesdae almal van hoe sleg dit met mense gaan, terwyl, as ek om my kyk sien ek ongelooflike nuwe ontwikkelinge, nuwe motors ens.  My konsultasie met die klient verander onmiddelik wanneer ek die ander kant vir hom wys en se dat kliente nie sukkel nie.  Kom uit die groef daarvan om SAAM te praat, sodat jy naderhand dinge begin glo wat nie jou eie denke is nie, en wat soms nie waar is nie.

Die vierde ding om te doen, vloei so effens uit die vorige oefening uit, en dit is dankbaarheid vir wat jy reeds het.  Kyk net gou vinnig om jou wat en wie jy in jou lewe het, en se dankie.  Vat 'n stuk papier en skryf gou 'n lys neer van dinge waarvoor jy dankbaar kan wees, en hou aan tot jy uit dinge uithardloop om neer te skryf.  Vir my is hierdie een van die kragtevolste dinge om te doen om my situasie te verander.  Dalk is dit hier waar jy verstaan dat jy nie jou huisverband kan betaal nie, maar om dankbaar te wees dat jy wel kredietwaardig is, 'n huis het, meubels het ens.  verander dalk jou ingesteldheid om 'n plan te maak om jou paaiement te betaal.  Dan verander die energie in jou lewe en skielik WIL jy jou situasie uitsorteer omdat jy dit doen uit DANKBAARHEID en nie uit dwang nie.

Die vyfde en net so belangrik soos die ander is om aksie te neem.  Tel op die foon en maak 'n reeliing met die bank, staan op en gaan drink 2 Panado's vir jou hoofpyn of stuur 'n SMS vir iemand wat vir jou belangrik is maar waar daar twis is.  Indien dinge in jou lewe OOK nie prakties verander nie, gaan al die bo-staande dinge absoluut niks beteken nie.  Jou bank gaan nie al hierdie mooi stories glo van positiewe denke en dankbaarheid nie, as jy nie betaal nie, gaan hulle jou huis kom haal.  Soms dink ons dat ons praktiese probleme met EMOSIONALITEIT opgelos gaan word.  Nee, die oefeninge hier bo oor al die spiritualiteit is SLEGS gerig daarop om jou in hierdie vyfde oefening die energie te verskaf om jou probleem te hanteer.  Een van my vriende se altyd:  "Talk is cheap, but money buys the whiskey". 

Ek hoop hierdie kan jou help om 'n fantastiese week te ervaar!
libdisc25112014

Wednesday, November 25, 2015

Grafte en Groewe



Die spreekwoord lei:  "Die verskil tussen 'n graf en 'n groef is slegs die diepte".  Ek onthou nog toe ek klein was het ek in die grond met my karretjies gespeel.  Omdat ek op 'n plaas was, het ek nie net paaie gemaak nie, maar ook met spykers en draad kampies gespan.  Dan het ek met 'n stokkie sulke vloeigroewe in die grond gemaak sodat die water na die kampies kon loop sodat die beeste genoeg water in elke kamp het.  Daardie groefies in die sand is nie ongelooflik diep nie, maar die water kon nerens anders heen as in en saam met die groefies nie.  Daardie groefies is ook redelik permanent en dit vat vreeslik lank om toe te gaan.  As jy nou ook daagliks daaraan karring, dan gaan dit omtrent nooit weg nie, maar word net dieper en wyer.

Daar is seker niemand meer daar buite wat nie erens op facebook 'n profiel het nie.  Ek hou nogal van almal se kommentaar OOR facebook, want of jy nou daarvan hou of nie, ons is maar nuuskierig oor wat in ander se lewens gebeur.  Een ding wat ek duidelik agterkom is dat jy jou facebook vriende in sekere kategoriee kan verdeel.  Sekere mense post altyd dieselfde dinge.  So het jy jou "kettingbrief" mense wat se dat as jy vir Jesus liefhet, jy dit moet deel met ander.  Dan het jy jou "feetjies" wat sulke sagte-lens prentjies met krul woordjies post.  Dan het jy die "braggers" wat altyd erens op 'n eksotiese plek in check.  Jy het ook jou "kermgatte" wat oor alles 'n eiertjie te le het, van slaggate tot politiek.  Jy kry ook die "grapgatte" wat grappies en snaakse video's oplaai wat natuurlik altyd 'n mens se dag ophelder.  Jy kry die "ernstiges" wat een of ander missie het wat hulle op is om mense se denkwyses te verander.  So kan 'n mens aangaan, maar een diing is dat mense nie sommer verander nie, jy kan seker weet dat sekere mense sekere dinge altyd gaan doen, sonder om jou in die steek te laat.

Hoe meer grys hare ek bykry, hoe meer besef ek dat mense nie sommer verander nie.  Toe ek jonger was het ek geglo mense kan verander, en ja, dalk kon die boompies gebuig geword het toe hulle jonger was, maar deesdae nie meer nie.  Net soos ek my facebook vriende kan indeel in sekere kategoriee, kan ek dit in die regte lewe ook doen.  Dalk moet ek dit anders stel, en eerder se dat mense nie maklik verander nie.  Hulle is dalk nie gelukkig met hulle groefie nie, maar hulle het nie die krag, kennis of lus om daar uit te klim nie.  Daagliks raak ek bewus van mense wat dieselfde dinge oor en oor doen, maar die teenoorgestelde uitkoms verwag.  Jammer, maar die lewe kan nie so werk nie.  Daardie plaas-groefies wat ek gemaak het vir die water lei die hele tyd die water na presies dieselfde kampie, dit is nie wensdenkery nie, maar die waarheid – altyd.  Ek het absoluut geen probleem met mense wat hulle pad gevind het en gelukkig is daarmee nie, maar ek het 'n probleem wanneer mense nie in hulleself kan kyk en so bietjie afstand neem en die groefies van hulle lewens bestudeer en analiseer nie.  As jy nie gelukkig is met die pad en rigting van jou lewe nie, verander dit!  Ons kripeer in ons groefies en dan word ons kwaad vir die gravitasie wat keer dat die water ander kant toe loop as af onder toe.  Ons word kwaad vir die feit dat die water nie loop na die kampie van ons keuse nie, maar hoe kan dit as ek nie die pad daarvan verander nie?

Die ander ding wat ek ook agtergekom het, en mense eintlik logies moet verstaan is, hoe langer jy in jou groefie aangaan, hoe dieper en wyer word dit en hoe moeiliker word dit om die rigting daarvan te verander.  Natuurlik kan jy altyd dit verander, maar dit is tog logies om te verstaan dat dit moeiliker gaan wees.  Die water gaan altyd die dieper groefie opsoek, en eers wanneer die nuwe groefie geskep is, dan kan dinge begin verander. 

Die groot vraag is – Hoe doen mens dit?

NEEM EIENAARSKAP

Die oomblik wat jy eienaarskap vat van jou groefies en besef dit is jy wat dit geskep het en net jy kan dit verander kan daar 'n ander uitkoms wees.  Te veel keer gee ons ander mense en situasies die skuld vir "ons" issues.  Gaan kyk na hoeveel interpersoonlike probleme daar is waar ons baklei met mense oor dinge wat nie hulle probleem is nie, maar myne.  Hou op om jouself jammer te kry en te dink dat die gravitasie teen jou is, sekere dinge is vas, maar dit is jou groefies wat in 'n rigting loop, en dit is nie die water se skuld dat dit net eenvoudig in die rigting loop wat JY bepaal het nie. 

Ek glo vas dat elke mens verantwoordelik is vir sy eie dade en groewe.  Te veel keer maak ons ander mense verantwoordelik vir ons groewe, of wil ons ander se groewe VIR hulle verander.  Nie een van die twee aksies is logies nie.  Mense is hoe mense is, en ek het al soveel keer probeer om mense raad te gee oor hulle groewe en veranderings te maak, maar ek het geleer dat as iemand dit nie self wil of doen nie, al die gepraat in die lewe nie gaan help nie, al wil jy hoe graag help.  Mense kan jou vra hoe om dinge te doen, maar die verandering kom of in mense of nooit, en dit is nie my of jou werk om dit vir hulle te doen nie.  So kan ek jou vandag herinner aan dinge waarin jy verval het en wat jou nie pas nie, maar ek kan dit net op papier raad gee, of jy dit gaan verander of gebruik is nie my verantwoordelikheid nie.

NEEM BEHEER

Baie mense huldig die standpunt dat hulle nie werklik in beheer van hulle lewe is nie, en indien hulle dit sou doen, dan gaan hulle selfsugtig moet wees en op sekere mense se tone trap.  Ek gaan nou nie in diepte sielkundig hier raak nie, maar jy is die argitek van jou eie lewe.  As jy voel iemand beheer jou lewe, dan is dit omdat JY die beheer van jou lewe aan hulle oorhandig het.  Ons glo dat ons nie sommer net oor mense moet loop nie, en ja natuurlik moet jy respek vir ander huldig.  Maar jy kan net respek vir hulle en hulle punte huldig, wanneer dit nie jou reg om jouself te wees van jou ontneem nie.  Te veel keer gee ons maklik beheer weg, net om dan daardie persoon verantwoordelik te maak vir ons groewe en hulle moet dan deur hoepels spring om ONS gelukkig te hou. 

Vandag en in hierdie oomblik  verstaan dit duidelik dat niemand anders jou gaan leer om kitaar te speel nie.  Die lewe is dieselfde, JY en jy alleen moet beheer vat van elke stukkie daarvan.  Selfs al is jy in 'n onmoontlike situasie, JY het die keuse in watter mate jy gaan reageer en HOE jy gaan reageer teenoor omstandighede.  Soms is dit nie die omstandighede of diegene rondom ons wat ons manipuleer nie, maar die feit dat jy hulle in 'n manipulerende rol in jou lewe plaas.  Besef dit is JOU lewe en net jy ken jouself beter as enige iemand anders, jy het die reg om te bestaan.  So baie keer is ons bang om beheer van ons lewens en die pad van ons lewens te neem, omdat ons dink ons mag nie.  Erens het iemand vir jou gese dat ander mense eerste moet staan, hulle nukke en grille moet eers hanteer word voordat jy MAG 'n kansie kry.  As jy by 'n mini-sirkel gaan staan en vir almal plek voor jou gee, gaan jy tot in ewigheid daar by die sirkel staan en wag.  Net soos met 'n sirkel het jy ook die reg as mede-gebruiker van die pad om ook 'n beurt te kry.  Dit beteken gladnie dat jy net eenvoudig deur die sirkel moet jaag en almal se lewens in gevaar moet stel nie.  Die Bybel leer ons dat jy jou naaste moet liefhe, soos jouself.  Ek sien baie keer hoe mense wat met ander mense fout vind of blammeer vir hulle ongeluk juis mense is wat nie hulle selfliefde uitleef nie, en alles altyd afhanklik maak van ander se optredes.  Vat vandag beheer en hou op lui wees en almal om jou die skuld vir JOU groewe gee.

NEEM BESLUITE

Besluit om die situasie te verander en in 'n nuwe rigting te beweeg.  Soms weet ons dat dinge ons probleem is, maar ons is so besig en so diep daarin gewikkel, dat ons nooit die besluit neem om te verander nie.  Die ander rede hoekom mense nie verander nie, is dat hulle nooit dink dat daar ander opsies kan wees nie.  Hulle hou eerder aan met dieselfde patroon, al werk dit nie, want hulle dink daar is nie 'n alternatief nie.  Dalk moet jy wakker skrik en besef dat jy kan verander, daar is legio moontlikhede wat tot jou beskikking is, maar tot jy nie daarna soek nie, gaan dinge dieselfde bly.
Soms is die besluit drasties en moet jy eers begin deur wal te gooi.  Gaan sit rustig en analiseer jou lewe en kyk waar jy dinge kan verander en waar nie.  Jy kan byvoorbeeld nie besluit jy gaan eers 9.00 skool toe want jy wil later slaap nie, sekere dinge is net hoe dit is en jy kan dit nie verander nie.

Jy moet ook verstaan dat ons kreature van gewoonte is, en daar gaan altyd groewe en repiterende aksies in jou lewe wees.  Dit vraag waaroor jy kan besluit is of die groef jou dien of nie dien nie.  Die Bybel self leer ons dat as iets jou nie pas nie jy dit moet afsny.  Natuurlik is dit soms te drasties in sekere gevalle, maar in ander gevalle is drastiese afsny die enigste manier om dinge te wil verander.

NEEM AKSIE

Ek is ook 'n baie gelowige mens, maar ek is ook iemand wat weet dat die groefies van my nie sommer net een oggend magies anders gaan lyk nie.  Net soos hier bo, vat verantwoordelikheid vir dinge en neem aksie.  Ek hou van die voorbeeld van my oom wat in Nederland woon.  Hy is baie musikaal, en mense se altyd vir hom:  "Aai, ek wens ek kon ook klavier speel!"  Dan het hy 'n baie interresante aanmerking:  "Hoe lank dink jy gaan dit jou neem om te leer klavier speel?".  Die antwoord wissel gewoonlik van mens tot mens, maar vir die voorbeeld kom ons gebruik 5 jaar.  Dan se hy altyd:  "Ok, hoe oud gaan jy wees oor 5 jaar?"  En dan antwoord iemand se nou maar 52.  Dan kom die punchline: "As jy dus vandag begin met klavierlesse, gaan jy op 52 kan klavier speel, as jy nie vandag begin nie, gaan jy oor 5 jaar steeds 52 jaar oud wees, maar jy gaan nie klavier kan speel nie".

Dit is spesifiek hoekom ek onderskei tussen besluite en aksie neem.  Baie mense wens en wil en besluit om diinge te doen, maar hulle doen dit nooit.  Om nie aksie te neem nie is dalk ook 'n groefie waarin jy beweeg, en dalk is dit juis die eerste en belangrikste groef wat jy moet verander.  En moenie uitstel nie, begin vandag en neem aksie in die rigting van die kampie waar jy wil eindig.

NEEM AANHOUDENDE AKSIE

Daardie groefies wat ek in die sand gemaak het, het nie ontstaan met een krap van die stokkie nie, maar aanhoudende aksie van my kant af.  Ek het nodig gehad om keer op keer weer in die groefie te krap totdat die water reg geloop het na my sin.  Te veel keer begin ons dinge, maar ons hou nie aan met dit nie.  Kenners vertel ons dat dit 28 dae neem om 'n gewoonte aan te leer of af te leer, maar dit beteken dat ek elke dag dit moet doen.  Ek weet ek praat tot vervelens toe oor negatiwiteit, maar ek was in daardie groef van depressie oor my lewe en dinge wat nie reg loop nie.

Dit het my jare geneem om my ingesteldheid te verander en nou nog moet ek in die oggend my watertjies aankeer na die regte groefie toe.  Ek moet die res van my lewe daaraan spandeer, want omstandighede verander nie noodwendig nie.  Ek het gekies en soek bewustelik elke dag na die water in die halfvol glas.  Veral negatiewe mense om my word nou selfs vir my 'n inspirasie om al meer en meer positief te wees, want hulle herinner my aan die uitkoms van negatiwiteit.  Sodoende draai ek nou selfs die negatiewe wat ander aan my doen of in my bestaan inbring na 'n positiewe, al is dit soms nie maklik om dit te doen nie.
Dit is baie soos om jou maagspiere te oefen.  'n Pakkie van 6 gaan nie skielik wys na 1 of 2 dae se oefening nie.  Dit is iets wat daagliks moet doen en soms gaan jy nie die resultate onmiddelik kan sien nie, tot daardie een oggend wat jy in die spieel die verskil begin agterkom.


Gaan grawe jou eie groewe, dit is JOU speelgrond en God het jou al die toerusting gegee om voluit te kan leef.  Jy mag groewe he, maar gaan leef JOU groewe en moenie dat jyself of ander jou in groewe laat hardloop waarin jy nie wil of kan leef nie, want dan leef jy in 'n graf.

Wednesday, October 28, 2015

Die Duiwel se vatkans!

Van die begin van tyd het daar die idee bestaan dat daar in die wereld goed en sleg is.  Die goed word gewoonlik aan 'n Goddelike figuur toegeken, en die slegte aan die Bose, in watter vorm ookal.  In jou lewe kom jy ook soms oor die pad van dinge wat vir jou voel asof dit nie pas nie, dit wat nie vir jou werk nie, en dan noem ons dit ook maar boos.  Alle mense, selfs jy, word soms geteken as 'n wese met hierdie dualisme in jou, jou lig kant en jou donker kant.  Soms lees ons die storie van die twee honde wat in jou woon, die goed en die sleg, en die een wat jy die meeste voed is die een wat later die ander een ook opeet.


Ek wil nie nou in 'n teologiese diskussie verval oor die bose en in watter tipe vorm dit aanneem en of daar iets soos 'n hel is nie.  Ek glo egter soos hier bo dat ons elkeen die bose en die goeie in ons het en dat ons elke dag in elke situasie 'n keuse maak tussen die twee.  Hierdie dualisme in ons het ek al baie oor geskryf, en ook dat daar 'n "plek" vir die goeie en die slegte in die lewe is, want beide leer jou die lesse wat jy nodig het om te leer.


Daar is sekere dinge wat van kleins af by my vasgesteek het, en een daarvan is om nooit die bose 'n vatkans in jou lewe te gee nie.  Wat eerstens vir my beteken het dat daar in elke situasie van die lewe beide kante gaan wees, so, net soos met enige "afhanklikheid", le die eerste stap in die erkenning daarvan.  Saam met dit, het ek ook besef dat ek graag nie die "mag" in my lewe vir die bose of die negatiewe dinge wil gee nie.  Natuurlik gaan daar situasies wees waar jy dit kies, wetend of onwetend, maar oor die algemeen is ek die een wat graag die halwe deel van die water soek, en nie kerm oor die bose in my bestaan nie. 


Ek sien soveel mense om my elke dag, in my persoonlike lewe en ook in my werksomstandighede met kollega's en kliente, waar almal soveel makliker die keuse maak na die pessimisme en vrees.  En soos in my vorige blog oor dat jy nie aan jouself moet doen wat jy nie wil he ander aan jou moet doen nie, leer ek dat JY soms jou eie grootste vyand is.  Ek se gladnie daarmee dat daar nie realiteite is wat op jou lewe 'n invloed het nie, maar wel dat jy in elke situasie die keuse kan uitoefen oor hoe jy daarmee gaan handel.  En soms gee ons deur ons keuses aan die negatiewe en die bose 'n vatkans in ons lewens.  Ek het die laaste paar weke enorme issues met sekere dinge in my lewe wat nie reg loop nie, en so kom ek vanoggend 3 uur toe ek nog wakker le dat ek soveel spanning het en die bose die geleentheid gee om my nagrus op te foeter.


Jy sien, wat gebeur is die volgende.  Jy het 'n situasie in jou lewe wat plaasvind, of wat jy meeste van die kere "dink" gaan plaasvind.  Nou leef ons mos in die idee dat jy god van jou eie lewe is, en dat alles in jou lewe perfek moet uitwerk.  Maar nou neem die stemmetjie in jou kop oor wat jou laat dink dat dinge nie gaan uitwerk nie, en dan sneeubal die gedagtes in jou.  Vrees neem oor en jou keel trek toe en jou maag kramp.  Jy kom nie eers agter nie, maar kort voor lank is jy vasgevang in die mag van hierdie gedagtes, dat jy aan niks anders kan aandag gee nie.  So gaan dae en nagte by jou verby en jy leef al IN die drama wat nog nie eers plaasgevind het nie, of nooit SAL plaasvind nie.  Onthou, emosies word nie net spandeer en gevoel IN die situasie nie, maar selfs al dink jy daaraan.  Die Bybel leer ons die konsep, in die konteks van sonde, dat as ek selfs net iets "dink", dit is asof dit reeds plaasgevind het. 


Nou, drie dinge gebeur, jy spandeer AL jou energie aan die probleem eerder as die oplossing.  Die attitude van vrees en worry beteken nie dit gaan weggaan nie, die toets en die D-Dag is oppad.  Die vrees steel al jou energie en laat jou met verminderde krag om eerder effektief die situasie te hanteer.  Toe ek op skool was en atletiek gedoen het, kon ek soms nie die nag voor die tyd slaap nie, en daar in my blokke het my hande gebewe.  Die vraag is hoekom?  Dit was die vrees vir verloor en dat ek myself gaan teleurstel.  Nou, wat het die nag wakkerle my in die sak gebring?  Ek is nie goed uitgerus nie en my liggaam kan nie optimaal funksioneer nie, so, my vrees vir die resies het reeds al my energie gesteel, en my kanse om die resies te wen verminder.


Die tweede ding wat gebeur is dat dit die NOU steel van my.  Dit is nou nie kernfisika nie, maar jy leef NET in die nou.  Baie mense leef in die toekoms en dink aan more, of hulle lewe in die verlede en so vergeet hulle om vandag aan die rose te ruik.  Die Bybel leer ons ook dat jy jouself nie oor more moet bekommer nie, want dit sorg vir homself.  Nou hoor ek weer jou praktiese kant wat se dat jy tog nie jou kop in 'n gat kan druk en die toekoms moet afskryf nie.  Dit is baie waar, maar hier gaan dit nie oor dat jy nie aan more "dink" nie.  Die beste voorbeeld hier kry ons in die spel van Gholf.  Jy kom van die bof af waar jy die gaatjie begin, en ja, jou doelwit IS die setperk en om jou bal in die gaatjie te kry.  Jy begin nie NOU al vrees oor daardie moeiike setperk nie, jy dink en het beheer EERS oor hierdie hou wat jy nou speel.  Jou doelwit bly dieselfde, maar die vrees vir die toekomstige hou neem jou fokus weg en lei daartoe dat jy meer kere HIERDIE hou van NOU laat misluk.  En as jy hierdie hou laat misluk, dan bou die druk soveel meer op daardie laaste set om die bal in die gaatjie te slaan.  Dieselfde geld vir die fokus op die vorige hou of gaatjie se mislukking of sukses, dit neem emosioneel oor, want gedane sake het nie keer nie.  Al wat belangrik is is hierdie oomblik waarin jy leef.  Waar jy vandaan kom en wat jou doelwit is bly dieselfde.


Die derde ding is dat ons leer in die Bybel van die bose wat se dat dit rondloop soos 'n brullende leeu.  Wat dit beteken, is dat hierdie negatiewe gedagtes NET so moeilik is om toe te pas as positiewes.  Maar hierdie bose dinge soos vrees en pessimisme kom na jou toe soos 'n roofdier, kort voor lank is jy in 'n hoek gedryf, want jy het dit nie verwag nie.  Geen mens gaan soek na die negatiewe per se in die lewe nie, dit SOEK jou.  En soms, net soos met roofdiere, word die swakstes onder ons eerste gevang.  Het jy al agtergekom dat die gevoelens van negatiwiteit en vrees gewoonlik kom wanneer jy op jou swakste is?  Dit is wanneer jy die donker hond in jou meer voer as die ligte een, dan gaan dit oorneem en sterker wees, en kort voor lank is die ligte kant van jou so hulpeloos dat dit gaan le of sommer net op die plek vrek.


Dit behoort ook nie kernfisika vir jou te wees nie, maar die realiteit hardloop nie weg nie.  Baie suksesvolle mense  se graag dat hulle nie fokus op die probleem nie, maar soek na die oplossings daarvan.  Meeste situasies wat jou laat vrees het aksie nodig en saam met aksie goeie uitgewerkte planne.  Hoe meer jy beplan en nugter kan dink, hoe meer bring jy die situasie onder beheer.  As jy die bose 'n vatkans gee in jou lewe, steel dit "spasie" in jou brein.  Staan op, gaan sit by 'n stuk papier met 'n pen en beplan HOE om die situasie te hanteer en soek vandag na oplossings, eerder as om onvoorbereid met vrees BY die situasie uit te kom en te besef dat jy dalk tien teen een, as jy nugter en objektief kon dink, 'n maklike oplossing kon gevind het.


Die laaste punt wat ek jou mee los vanoggend is, 99% van al jou vrese word nooit waar nie, die ander een persent is beslis, en dit kom gewoonlik wanneer jy nie soek na oplossings nie, en 99% van dit wat jy vrees kan opgelos word met eenvoudige en nugtere beplanning.  Mense gaan deur hulle lewe met pessimisme en 'n gemoed van opgee teenoor die druk van vrees, en sodoende mis hulle elke wonderlike geleentheid om te lag in vandag.  Moenie aan hierdie negatiewe emosies die mag gee nie, slaan dit op hok soos 'n wilde leeu.  Weet en besef dat al hierdie denke jou gaan kom soek, dalk deur 'n gesprek van iemand of 'n whatsapp of tyding wat jy oor die foon ontvang.  Dit gaan jou kom soek, maar onthou altyd, die leeu "bekruip" jou nie, hy brul, so let op en besef waar en wanneer hy beplan om toe te slaan.