Omvorming

Ek het ‘n vriendin op Universiteit gehad wat ‘n studie gedoen het oor “leuses”. Uitsprake wat lande, skole en mense maak. Die konklusie van haar studie was dat mense in hierdie uitsprake nie werklik eerlik is met wie hulle is of was nie, maar eerder ‘n standpunt gestel het oor hoe hulle graag WIL wees, WIL dink en WIL doen. Dit is eerder ‘n refleksie van die idée wat hulle in die spieel WIL sien, wat soms die teenoorgestelde is van wat hulle nou WEL sien. Dit is ook ‘n rookskerm wat hulle vir jou voorhou oor wat hulle graag wil he wat jy van hulle moet dink.

Louise Hay skryf in haar boeke dat die rede hoekom mense dit doen, moontlik kan wees dat alles wat ons doen gebore is uit skuld en vrees. Dit lei nie net tot emosionele problem nie, maar fisiese siektes. Enige siekte is gebore daaruit. Siektes kom van maskers.

Ek was die laaste ruk gekonfronteer met situasies waar ek presies dit gesien het. Mense wat gryp in hulle lewens na allerhande dinge wat werklik nie belangrik is nie, as rookskerms om by selfverwesenlikking uit te kom. Mense wat een ding doen, wat hulle weet nie is wie hulle werklik is nie, om sodoende by ‘n doelwit uit te kom wat hulle dink hulle wil bereik. Ons gebruik allerhande maskers, en het die idée dat die ander met hulle maskers saam met ons by die doelwit gaan uitkom.

In Afrikaans gebruik ons die spreekwoord: “Dit is soos 2 blindes wat mekaar lei”. Die problem van is dat die rekkie wat die masker vashou op ‘n stadium gaan slap word, en jy jou werklike gesig gaan en sal moet wys.

Hierdie begin weer ‘n totaal nuwe kringloop van skuld en vrees, wat weer, om dit te verskans ander maskers ontwerp om dit weer weg te
steek.

Gregory House in sy reeks HOUSE, se: “Everybody lies, the question is just about what?” Dit is die rede vir die wereld waarin ons vandag leef, waar niemand is wat hulle werklik is nie, nie net omdat hulle skaam is nie, maar soms omdat hulle nie weet wie hulleself is nie. Ons loop elke dag draaie weereens rondom die Bybel en ander boeke wat ons soveel riglyne gee van praktiese toepassings gee wat ons kan doen, en al wat ons doen, ons haal dit aan en dit word weer vir ons ‘n masker.

Ons kies dus die masker wat in ons en in ander die leuen-lewe die beste pas. Hoeveel mense het al in die aanhalings en dinge in die Bybel en selfhelpboeke toegepas in hulle lewens? Hoe het die tekkie al die teer getref in mense se lewens? Ons dra almal maskers omdat ons nie weet wie ons is nie, en nie weet dat werklike geluk eers kan kom wanneer die waarheid ons vrymaak nie. En geen wonder dat mense se ongeluk sneeubal nie, want solank ons nie ons werklike self word en die werklike waarheid erken en leef nie, is en sal ons nooit werklik gelukkig wees nie.

Waar lê die waarheid dan? Die Bybel stel dit dat ons eers die koningkryk van God moet soek, en al die ander dinge sal ons toegevoeg word. Maar tot toevoeging daartoe is Romeine 2: “Moenie aan die wereld om jou gelyk word en doen wat almal doen nie, maar laat God toe om jou te omvorm. Dan sal jy kan onderskei oor wat God se wil vir jou lewe is, wat reg, goed en volmaak is”.

Op Universiteit het ek in die teologieklas met my professor gestry oor sy aanmerking dat die oplossing van alle probleme by ‘n verhouding met God begin.

Nou, later in my lewe en my ervarings besef ek dit van myself en die mense om my. Hier praat ek van die werklike God. Dit hang hier af van watter God jy gaan kies, want die Bybel vertel ons ook dat daar ander gode is wat ons kies, maar daardie gode het nie die mag tot omvorming nie, hulle het net die mag van konsekwensies en erger probleme in ons lewens. Net die werklike God kan skep en herskep. Net die werklike God kan die maskers onnodig maak. Net die werklike God kan die skuld en oordeel wat jy en ander oor jou bring vergewe en jou toelaat om die mens te wees wat Hy jou gemaak het om te wees. Net hierdie God kan jou werklik omvorm.

Iemand het gister op facebook genoem dat ‘n ou moet “Let Go, and Let God”. Iemand vra toe vanoggend hoekom dit so moeilik is. Ons moet weet dat dit eenvoudiger is as wat ons dink, want die antwoord le nie in die kies van nog ‘n masker nie, maar om op jou eie, in jouself oor te gee. Dit is omdat ons nie oorgee aan God nie, maar weereens oorgee aan ons gewoonte om te bestuur en self god te probeer wees en te dink dat ander ons gode is en dat hull eons gaan red. Dit is nou een van daardie aanhalings wat nooit gaan werk nie.

As die mense en die dinge in jou lewe altyd tot dieselfde konsekwensies lei, miskien is dit werklik tyd dat jy die beheer van jou lewe oorgee aan God en aan God se genade en God werklik toelaat om jou te vorm soos Hy jou alleen kan en wil vorm. Miskien moet die praatjies ophou en die filosofiee en aanhalings wat ons elkgeval nie doen nie, en in stille meditasie onsself aan God oorgee, en fokus op dit wat werklik belangrik is.

Dan sal en alleen dan sal jou lewe in plek val! God se wens vir jou vandag!